Jordy ta un mucha cu semper ta siña te unda e por. E no ta e mucha di mas sabi, pero e ta haci su maximo esfuerzo.

“Jordy, cuanto bo a haya awe pa bo geschiedenis proefwerk?” mami ta puntra den auto na caminda pa cas.

Contento Jordy ta contesta: “Mami, mi a haya un 6½.”

 

 

“Un 6½ so!” mami ta contesta decepciona.

“Mami, tabata tin preguntanan dificil aden, cuatro mucha so a haya voldoende.”

“Esey no ta excusa, abo si ta bobo, nunca di mi bida mi a haya menos cu  9 pa geschiedenis. Awe si bo no ta hunga ‘playstation’, bo ta na straf!”

 

 

 

Jordy ta yega cas y bao yoramento e ta bay den su camber.

“Pa mami y papi nunca mi ta haci algo bon”, Jordy ta bisa su mes.

Atardi papi ta yega for di trabao y mami ta cont’e cu Jordy a haya solamente un 6½ pa su proefwerk.

“Solamente un 6½! Unda e mucha ta?!” papi ta reacciona rabia.

“Ay, den su camber manera semper”, mami ta contesta. Rabia papi ta bay busca Jordy.

E ta dal e porta di camber di Jordy habri y cuminsa grita:

 

“Abo si ta un burico, bo no ta sirbi ni pa siña drechi. Bo no por ta mi yiu. Wak bo ruman grandi cu ta na Colegio, e si merece ta mi yiu. Abo no ta sirbi pa nada.”

Jordy ta wak su tata cu awa den wowo.

 

 

“Di berdad mi no ta sirbi pa nada?” e ta puntra su mes.

Jordy ta cay riba cama y pa no pensa mas riba loke papi a bis’e e ta cende television.

Riba un di e canalnan tin un programa unda dos persona ta papia tocante con bo por haci un mucha dolor cu palabra.

 

 

 

 

E programa aki ta capta atencion di Jordy.

E ta scucha e meneer bisa: “Ora bo ta papia malo cu un mucha, por ehempel bo ta bis’e cu e ta bobo, e no por nada, e no ta sirbi, mihor nunca el a nace. Esakinan ta palabranan cu ta haci un mucha hopi dolor. Mucha tambe tin sentimento, cu hende mester respeta.”

Jordy no ta pensa dos biaha, ta coy telefon, yama su prima grandi, ken e ta stima hopi.

E sigur lo scuch’e.

 

 

El a tuma e decision pa yama un persona cu e ta stima y confia.

 

Bo tambe por!

 

 

Jordy a haci bon!