Cedrik ta cana bin cas y na caminda e ta topa su bisiña, meneer Albert.

“Con a bay awe na school Cedrik?” meneer Albert ta puntra.

“Hopi bon, meneer Albert”, Cedrik ta contesta.

“Cedrik, mi tin un uniform di beisbol nobo nobo cu mi a cumpra pa bo”, meneer Albert ta bisa. “Bin mi cas un rato pa bo wak’e.”

 

Cedrik ta cana bay cu meneer Albert. Ora nan a yega, meneer Albert ta bay cune te den su camber pa wak e uniform.

Diripiente meneer Albert ta bis’e: “Kita bo paña pa bo pas’e di biaha!”

“No, mi ta hib’e mi cas, anto eynan mi ta pas’e”, Cedrik ta contesta.

 

 

“Pakico? Aki mes bo por pas’e. Bin mi ta yudabo”, meneer Albert ta bisa.

Meneer Albert ta cuminsa mishi cu Cedrik su curpa. Cedrik ta sinti’e fastioso pasobra e no ta gusta esaki. E ta haya miedo.

 

 

 

Cu un mirada straño meneer Albert ta bis’e: “Corda bon, no bisa niun hende, esaki ta keda entre nos dos, oké?!”

Dianan ta pasa y Cedrik ta sinti su mes malo y cu berguenza. E no kier bisa mami ni papi nada, pasobra asina e ta traiciona su amigo, meneer Albert.

 

 

Un dia na school, juffrouw ta cuminsa les cu un articulo cu a sali den corant tocante abuso di mucha. Cedrik ta scucha juffrouw cu boca habri. Esey t’ami, e ta pensa y e ta wak rond den clas.

Cedrik ta sinti manera cu tur wowo ta riba dje.

 

 

 

 

Nan sa? e ta puntra su mes. Na final di e les juffrouw ta ripiti: “Muchanan, ora un hende mishi cu bo y bo no kier, bis’e NO y cor’e bay. Conta un hende cu bo ta confia loke a pasa.” Asina mes, Cedrik ta pensa.

 

Despues na caminda pa cas Cedrik ta topa meneer Albert.

“Ata Cedrik! Con ta bay ? Bo ta bin mi cas pa wak un video?”, meneer Albert ta puntr’e cu un sonrisa.

 

 

Atrobe Cedrik ta haya miedo, pero e biaha aki e ta corda loke nan a siña awe den clas.

“No! Mi no por!” e ta grita y ranca un careda bay cas.

Anochi e ta tuma e decision di skirbi un carta pa su juffrouw tocante loke a pasa cune.

 Cedrik a haci bon!

 

 

 

Keda conta loke a pasa cu bo te ora un hende scuchabo y yudabo!

 

Cedrik a tuma e decision di conta su juffrouw, cu e ta confia. Ta bon pa no keda cu un secreto cu ta molestiabo y ta dunabo miedo. Si e prome adulto no kerebo, conta un otro hende.